Itũrainĩ rĩmwe nĩkwarĩ na mũtumia warĩ
kĩo mũno wetagwo Wacũ. Ndendetwo nĩ andũ aingĩ tondũ nĩ mamũiguagĩra ũiru nĩ kĩo
giake. Mahinda maingĩ kũngĩakorirwo na iruga mũciĩ ndendekanaga akorwo kuo agenĩ
magĩũka.
Mũthenya ũmwe nĩ gwakorirwo gũgĩthĩnjwo
na ota ũrĩa amenyerete, nĩerirwo athiĩ mũgũnda akarĩme. Urĩa andũ aĩngi
matamenyaga nĩatĩ gĩkeno kĩa Wacũ gĩakinyanagĩra hĩndĩ ĩrĩa ekũrĩma kana ekũruta
wĩra mũrĩtũ. Nĩ ũndũ ucio Wacũ nĩoire mũro wake, ona kĩondo, akiumagara agĩthiĩ
mũgũnda.
Mũgũnda wa Wacũ warĩ handũ haraya na
muciĩ ona gũtuĩka mũndũ ee mũgũnda nĩangĩaiguire rucĩngũ rwa nyama ikĩhĩhio.
Wacũ ndatangĩkaga ngoro ona rĩrĩa ekũigua nyama cia njino ikĩnunga. Aiganagĩra
na kĩrĩa angĩonire kũu mũgũnda. Kwĩ hingo angĩenjire waru cia maitĩka kana mĩanga
ona kana ikwa. Ndagaga tũkũ tũnini tũrĩa angĩakirie natuo mwaki na ahĩhie kĩrĩa
enakio.
Mũgũnda wa Wacũ warĩ hakuhĩ na rũũĩ na
anyota nĩathiaga agataha maaĩ na irũtũ na akanyua. Angĩakorirwo atekwenda
gutinda agĩthiĩ rũũĩ nĩ akuaga ndigithũ nĩguo athiĩ rũũĩ o rimwe atahĩrĩre maaĩ
ma kũmũigana mathaa marĩa mothe angĩakoriruo ee mũgũnda.
Mũthenya ucio kwao gwathĩnjagworĩ, ota
urĩa amenyerete nĩoimagarire agĩthiĩ mũgũnda. Akinya nĩahithire kĩondo na mũro
kĩhingainĩ na agĩthiĩ rũũĩ gutahĩrĩra maai ndigithũinĩ yake. Rĩrĩa acokire mũgũnda
akĩrika ogũkĩrĩma na kĩĩo kĩrĩa guatũmĩte aage kwendeka. Ona akorwo nĩaiguaga
nyama ikĩnunga wega kũũrĩa mũciĩ ndatindĩrĩire tondu nĩ ũndũ amenyerete.
Kũu mũciĩ nakuo mĩtaratara ya ithĩnja
na kwĩharĩria nĩ undu wa ageni nĩ yathire na mbere owega. Gwathĩnjĩtwo mbũri
inya tondu nĩ ageni aingĩ matanyitwo. Mbũri icio nĩciang’eirwo oo mathaa ma rũcinĩ
nĩ getha arĩa mamiragia mara na arĩa matundagĩra makurwo na ihinda rĩa kũigana
kũrĩkia wĩra wao matari na ĩhenya.
Otaũrĩa warĩ mũtugo wao, nyama nĩciaharĩirio
wega. Higo igĩthondekerwo tuirĩtu, nacio ngaaĩ ikaharĩrio nĩũndũ wa athĩnji. Nĩ
tondũ wa ũrĩa mbũri icio ciarĩ noru, hĩndĩ ĩrĩa ngaaĩ cĩagĩrĩirwo mwakinĩ-rĩ,
mutararĩko mwega urĩa woimire ho nĩwagucĩrĩirie nyoni nene, ndĩa-nyama cĩa
muthemba wa hũngũ. Nyoni icio nĩciarerire rĩerainĩ oigĩthĩũrũrũkaga igĩetha ũrĩa
ingĩhuria nyama icio.
Nĩ tondũ wa urĩa athĩnji matanarĩa
ngaaĩ makoragwo mehugĩterĩ, hũngũ nĩ ciagire kaanya ga kũhuria ngaai ona mũgio.
Athĩnji marĩkia kũrĩa ngaaĩ nimambĩrĩirie kũhĩhia nyama ĩria yaharagĩrio nĩ ũndũ
wa ageni. Hau nĩho maigĩrĩire moko, magũrũ, na mbaru cia mbũri ĩmwe mwakinĩ. Nĩ
tondũ wa kũrĩa nyama cia athĩnji, nĩmakoretwo manyihanyihĩiruo nĩ thuti wa
nyama na makĩriganirwo nĩ hũngũ iria cietereire ihinda otarĩũ.
Mwanake ũrĩa wahetwo wĩra wa kũrira
nyoni itikahurie nyama nĩambĩrĩirie gũcũnga tondu arĩĩte ngaaĩ ona mũgĩo na mũkoroko.
Mũthuri urĩa wacinaga nyama rĩrĩa eheririe gĩkeengeto nĩguo arute guoko tondũ
kwarĩ kũhĩu amakire nĩ gũkuona rĩerainĩ. Hũngũ yakoretwo yetereire ihinda otarĩũ
na yahuririe nyama ĩyo ta kũbucia kwa ritho.
Mũthuri ũrĩa akĩrika okugĩrĩria, “Ĩyo!
Nyama yothe nĩyagĩthiĩ!” Mũthuri ucio nietire hũngũ iyo marĩtwa maingĩ na moru
matangĩandĩkĩka haha. Athuri arĩa angĩ nĩmokire kũrora nĩkĩ gĩatuma muthuri ũcio
ahiũkĩrwo ũguo magĩgĩkora atĩ nĩ kĩgũũta kĩa mwanake kĩarekereria hũngũ ĩhurie
nyama. Mwanake ũcio nĩakũmirwo mũno na akĩingatwo hau. Athuri acio nĩmamwĩrire
ainũke na ndakanonekane handũ athuri marĩ.
Hũngũ yarĩkia kũhuria nyama nĩyakĩũmbũkire
yerekeire irathĩro kũrĩa mugunda wa Wacũ warĩ. Hũngũ ĩyo ĩkĩhuria nyama ndĩamenyete
atĩ nĩ hiũ. Nĩyakĩgeririe gũcenjania nyama ĩyo gatagati ka magũrũ mayo meerĩ na
mũthia wa uhoro ĩkĩmĩrekia. Nyama ĩyo yarekio yokire ĩkĩgũa oharia Wacũ aarĩ.
Aambire kũmaka tondũ ndamemenyete nĩkĩ gĩkĩ kĩagũa oo mbere ya maitho make.
Abaara akĩona nĩ guoko kwa mbũri kũhĩhĩtio
weega nĩ mũndũ ũũĩ ũrĩa areka. Wacũ nĩehũgũrire akĩrora mĩena yothe nĩguo atigĩrĩre
atĩ ti mũndũ ũramũthakĩra. Rĩrĩa onire gũtirĩ mũndũ hakuhĩ, agĩikara thĩ akĩrĩa
nyama yake kahoora Atarĩ na ihenya akiugaga, “Ĩno ndagĩtunya ũũ kana ti Ngai
wamĩtũma nĩ kuona ũrĩa nyuma mũhũtu”. Nĩ kĩo gukĩragwo atĩrĩ, “Ciakorire Wacũ mũgũnda”.
Nĩ nyama cĩamũkorire mũgũnda.
Ũrutani: Rũgano rũrũ rũtũrutaga kũgĩa na kĩo
tondũ maũndũ mega marĩtũkoraga wĩrainĩ ũrĩa tũraruta no ti mũciĩ tũkomete.
